• Heim
• Um felagið
• Skipini
• Leinkjur
• MSC góðkenning

 1. januar í 2018 fara verandi fiskiloyvi úr gildi og øll fiskirættindi fella burtur. Enn vita vit onki um, hvussu fiskivinnan verður skipað eftir 2018. Fíggingarstovnar siga longu nú, at politiski vágin er so stórur, at í løtuni er ikki hugsingur um hjá peningastovnunum at fara undir at fíggja størri og betri fiskiskip, og teir siga, at fiskivinnan er í dag ikki serliga áhugaverd hjá peningastovnunum at fíggja.

 

Limirnir í Felagnum Nótaskip reka tey størstu og dýrastu skipini í føroyska fiskiflotanum, og tí vil felagið gera sítt til at fáa gongd á orðaskiftið um framtíðar loyvisskipanina í fiskivinnuni.

 

Felagið bjóðar hervið tykkum til fund í Norðurlandahúsinum fríggjadagin 29. apríl 2011 kl .13.

Tað vera tríggir fyrilestrahaldarar, teir eru Ragnar Arnason, úr íslandi, Jóannes Jacobsen og Leivur Mohr.

 Ragnar Arnason er professari í fiskivinnubúskapi og formaður á deildini fyri búskaparligari gransking á Háskúla Ísland. Hann hevur útbúgving sum M.Sc í matematiskum búskapi frá London School of Economics, og hann hevur skrivað Ph.d ritgerð við University of British Columbia um búskap og náttúrutilfeingi. Síðan 1990 hevur hann serliga granskað innnan fiskivinnubúskap og fiskivinnuumsiting, og hann hevur skrivað meira enn 160 vísindaligar greinir og fleiri bøkur.

 

Í framløguni vísir Ragnar Arnason á, at nógvir fiskiskapir kring um í heiminum kasta lítið av sær búskaparliga.  Høvuðsorsøkin til hetta er felags ognarrættur til fiskiríkidømið. Hetta hevur við sær, at fiskiorkan er ov stór, og at fiskastovnarnir minka. Tí er lønsemið lítið ella onki í fleiri fiskiskapum, sum harvið geva sera lítið íkast til tjóðarbúskapin. Hann vísir á, at umsetiligar eginkvotur er tann skipanin, sum gevur mesta íkastið til samfelagsbúskapin, og tess færri avmarkingar eru í skipanunum, tess størri verður búskaparliga íkastið.

 

Jóannes Jacobsen er útbúgvin Cand. oecon og hevur útbúgving sum M.Sc í búskapi frá London School of Economies and Political Science. Hann hevur skrivað Ph.d ritgerð við heitinum "Longevity and Electoral Rules as Determinants of Comparative Development”. Hann hevur starvast sum fulltrúi og ráðgevi fyri Búskaparráðið og sum granskari á SFI - Det nationale forskningscenter for velfærd í Keypmannahavn. Nú starvast hann sum seniorráðgevi á Centre for Economic and Business Research, CBS, í Keypmannahavn.

 

Jóannes Jacobsen hevur verið sera virkin í orðaskiftinum seinastu tíðina um framtíðar kvotuskipanina í Føroyum. Í framløguni vísir hann á, at verandi politiska-umsitingarliga skipanin til útluting av fiskirættindum er ikki brúkilig. Hann heldur, at ein skipanin við eini almennari uppboðssølu av fiskirættindum, kann endurreisa fiskiskap sum grundarstein undir føroyska búskapinum. Hann vísir á, at við at bjóða fiskatilfeingið út í fríari kapping á einum skipaðum marknaði, vilja teir reiðarar, sum klára at fáa fyritøkuna at bera seg á vinnuligum grundarlagi verða verandi í vinnuni, meðan aðrir hvørva úr vinnunum. Hetta vil hava við sær, at samlaðu kostnaðirnir av at fáa veiðuna til høldar gerast so lágir sum gjørligt, og at vinnan tí kastar sum mest av sær til samfelagsbúskapin.

 

Leivur Mohr er vinnukundaráðgevi í Føroya Banka. Í framløguni "Fiskivinnan í Føroyum sæð úr sjónarhorninum hjá teimum, ið fíggja" vísir hann m.a. á, at fiskivinnulóggávan avmarkar munandi um møguleikarnar fyri at optimera raksturin hjá vinnuni. Hann vísir á, at tað er ein stórur trupulleiki hjá vinnuni, at hon ikki veit, hvat skal henda eftir 2018. Somuleiðis vísir hann á, at politiski váðin er so stórur í løtuni, at tað ikki er hugsingur um hjá peningastovnunum at fara undir at fíggja størri og betri fiskiskip.