Kringvarp.fo: Makrelkvotan verður 85.000 tons.
Tilmælið verður 85.000 tons av makreli í ár, tá landsstýrismaðurin í fiskivinnumálum fer á landsstýrisfund í morgin.
Jacob Vestergaard heldur fast um, at Føroyar eiga 15 prosent av tilmæltu heildarkvotuni, og 15 prosent eru 85.000 tons.
So veldst um, hvat hini í landsstýrinum halda um tað, sigur Jacob Vestergaard.
40.000 tons eru longu farin. Føroysk skip fingu 14.000 tons fyrr í hesum mánaðinum og útlendingar hava fingið makrel í býti við annan fisk, millum annað hevur Russland fingið makrel fyri tosk í Barentshavinum.
Á landsstýrisfundinum, sum verður á middegi í morgin, kemur eisini uppskotið um fiskidagarnar næsta fiskiár. Tað uppskotið skal leggjast fyri tingið ólavsøkudag.
Jacob Vestergaard vil ikki upplýsa í dag, hvat hann mælir til viðvikjandi fiskidøgum. Men greitt er, at nú koma lemmatrolararnir við í fiskidagaskipanina.
